Парада на тихувањето
Овој град мириса на зачмаеност
овој град мириса на врела крв.
Асфалтот гори од украдени детски сонови,
Ние сме идеална драмска ситуација:
вистинската генерација,
ама погрешни места и денови
Дрвјата преку ноќ се ничкосуваат,
ко што ги даваме годините на вересија
а за возврат фино спакувана депресија
болест на новото време – пренесуваат.
Депониите ни дојдоа на прагот,
од сè што мислеа дека нема да се врати
сега се сврти и налет, ни затропа на врати.
Дали, пак ќе никне убав градот?
Разочарана генерацијо во тих гнев,
ова не беше финалето за кое трениравме,
Рекордот на разочарувањето го надминавме
Носталгијата е крива, ех јас кога бев…
Сонцето заоѓа во боите на исчекувањето,
со вредностите кои не постојат,
погледи што не можат да достојат.
Легни си, ништо нема да смени размислувањето.
Марија Митева
Авторка на „Највисокото дно“.